سونالی بیندرے اور عرفان خان کے بعد کیا اب رشی کپور اس مرض سے لڑ رہے ہیں؟

پچھلے ہفتے 29 ستمبر کو بالی وڈ اداکار رشی کپور نے ایک ٹویٹ میں کہا کہ وہ کچھ عرصے کے لیے کام سے چھٹی لے کر علاج کے لیے امریکہ جا رہے ہیں۔ انہوں نے ساتھ ہی یہ بھی کہا کہ پریشانی کی کوئی بات نہیں اور اس بارے میں قیاس آرائی نہ کی جائے۔ اور یہ بھی کہ اپنے چاہنے والوں کی دعاؤں کے ساتھ وہ جلد ہی واپس لوٹ آئیں گے۔

انہوں نے تو کہہ دیا کہ قیاس آرائی نہ کی جائے مگر کچھ عادتیں چھوٹے نہیں چھوٹتیں۔ یہ ٹویٹ آتے ہی، خاص طور پر اُن کی والدہ کرشنا راج کپور کے انتقال پر ان کی اور ان کے خاندان کی غیر موجودگی کے بعد انڈیا اور پاکستان دونوں ملکوں میں میڈیا پر ان کی بیماری کے بارے میں خبریں چھپنے لگیں۔ یہاں تک کہ ان کے بھائی رندھیر کپور کو سامنے آکر کہنا پڑا کہ رشی کپور کو کینسر ہونے کی باتیں سب افواہیں ہیں اور ان میں کوئی سچائی نہیں۔ انہوں نے انڈین میڈیا سے بات کرتے ہوئے کہا کہ ’ابھی ان کے ٹیسٹس ہونے باقی ہیں، اور ابھی وہ خود نہیں جانتے کہ معاملہ کیا ہے۔ ایسے میں لوگ کیسے اس طرح کی افوائیں اڑا سکتے ہیں۔‘

شاید اس طرح کی افواہوں کے پھیلنے کی ایک وجہ یہ بھی ہے کہ حال ہی میں بالی وڈ کی کم سے کم دو شخصیات کے بارے میں پتہ چلا ہے کہ انہیں کینسر ہیں۔

اس سال جولائی میں سونالی بیندرے نے اپنے ایک انسٹاگرام پوسٹ میں اس بات کا انکشاف کیا کہ انہیں ہائی گریڈ کینسر ہے۔ انہوں نے لکھا کہ ’عین اس وقت جب آپ اس کی توقع نہیں کر رہے ہوتے زندگی آپ کے سامنے مشکلیں کھڑی کر دیتی ہے۔ مجھے حال ہی میں پتہ چلا ہے کہ مجھے ہائی گریڈ کینسر ہے جو اب پھیل چکا ہے۔ میں نے کبھی سوچا بھی نہیں تھا۔ ایک درد تھا، کچھ ٹیسٹ کرائے اور یہ انتہائی غیر متوقع بات سامنے آئی۔۔۔‘

اس کے بعد سے سونالی بیندرے نے اپنے اس سفر کی کئی تصاویر انسٹاگرام اور ٹوئٹر پر پوسٹ کیں۔

عرفان خان نے مارچ میں اپنے ایک ٹویٹ میں اس بات کا انکشاف کیا کہ انہیں ایک سنگین بیماری ہے۔ انہوں نے لکھا، ’زندگی کبھی کبھی آپ کو جھنجھوڑ کر جگا دیتی ہے۔ میری زندگی کے پچھلے پندرہ دن کافی پُرتجسس تھے۔ میں نے کبھی نہیں سوچا تھا کہ نایاب کہانیوں کی تلاش میں ایک دن ایک ایسی بیماری کا شکار ہو جاؤں گا جو بہت ہی کم لوگوں کو ہوتی ہے۔‘ اس پیغام میں انہوں نے لوگوں سے یہ بھی درخواست کی تھا کہ غیر ضروری قیاس آرائیاں نہ کریں۔

پھر جون میں لکھے گئے ایک خط میں انہوں نے اس بیماری سے اپنی لڑائی کی تفصیل بیان کی جس پر انہیں بہت سراہا گیا۔

سونالی بیندرے اور عرفان خان دونوں کا علاج جاری ہے۔